torsdag 20. desember 2012

God jul!


Denne illustrasjonen er frå boka "Skog, eller noko som har med skog å gjere" av Eva Jensen, utgitt på Det Norske Samlaget i 2010. Med den vil eg seie god jul, og eg gler meg til 2013! Over nyttår skal nemlig Edvard byrje i barnehagen, og eg kan byrja å jobbe igjen! Eg klør i fingrane etter å få teikne skikkeleg att. Me sjåast i det nye året!

fredag 26. oktober 2012

Åfarnes




Når det blåste i den lille bygda, 
sprang alle ned til båtane sine for å sjå at dei hadde det bra.

onsdag 17. oktober 2012

The brontosaurus never existed

Då eg studerte lagde eg eit bokprosjekt der eg både skreiv teksten og lagde illustrasjonane sjølv. Dette prosjektet fulgte meg heile tida medan eg jobba med det, og det førte med seg fleire småprosjekt undervegs; eg prøvde blant anna ut gamle trykkpresser og leika meg med grafikk.  Historia handlar om ein mann si søken etter identitet, og eg brukte i hovudsak teikning og collage for å illustrere teksten.  

Av alle arbeida i boka er det denne som fortsatt følgjer meg vidare. Eg er fortsatt glad i kombinasjonen av blyant, måling og fargeblyant. 

torsdag 11. oktober 2012

Pubertet og 4H

Her er enda ei teikning frå fanzina "Pubertet" som eg har vist tidligare her og her. Motivet er frå ein 4H-tur ein gong på 90-talet, då sykkelshorts og store t-skjorter var på mote. Me for til ein avsidesliggande husmannsplass innerst i ein fjord, og eg og venninna mi var overbevist om at det skjulte seg ein hemmeleg bunkers under eit berg i nærleiken. På veg heim hang me ut or bilvindauget i fart, og me følte oss så vill og levande som ein kan når ein er 12 år. 

På ein annan 4H-tur køyrde me inn i ein fjord for å sjå på helleristingar, og der blei eg putta inn i bagasjerommet på ein bil. Heldigvis slapp eg fort ut att; dette var altså ikkje ei kriminell handling, men skjemt og morro på bygdevis.

tirsdag 2. oktober 2012

Kreativitet i kvardagen

Då Edvard var liten baby hadde han kolikk. Alle som har hatt kolikkborn veit at då er det ikkje mykje anna livet dreier seg om; ein bysser og bysser på den vesle i håp om at gråten skal stagge for ei lita stund. Det var verken tid eller ork til å vere kreativ, og eg følte nesten at eg mista meg sjølv oppi det heile. Redninga mi blei Instragram. Eg trilla eviglange turar, for Edvard sov godt i vogna, og eg brukte tida til å jakte på spanande motiv. Det gjorde underverker for meg, og det fekk meg til å gløyme alt det tunge ei lita stund. No er det lenge sidan Edvard hadde kolikk, han er ein blid og glad krabat, men det er nok å henge fingrane i! Det kan gå perioder der eg ikkje har tid eller inspirasjon til å finne fram skisseboka, men å knipse bilete gjer eg heile tida. Det skal ikkje alltid så mykje til for å føle at ein bruker dei kreative sidene av seg sjølv, og det gjer underverker i ein travel kvardag! 

torsdag 13. september 2012

Work in Progress

I 2009 hadde eg og venninna mi Stine utstillinga "Work in Progress" her i Oslo. Me stilte ut ferdige arbeid, skisser, teiknebøker og idear. Rett og slett work in progress. Me leigde lokale og arrangerte heile utstillinga sjølv, og eg blir fortsatt stolt når eg tenkjer på den innsatsen me gjorde.

Det var ein veldig lærerik prosess, og det var deilig å sjå arbeida våre i eit gallerilokale etter fleire månader med planlegging. Det er noko avsluttande ved det å stille ut, og det var det som var litt av tanken bak denne utstillinga og. Å få oppsummere litt kvar me stod etter tre års skulegang og eit par år med prosjekter. Kva slags arbeid var ferdig og kunne rammast inn? Kva slags arbeid var i skissestadiet fortsatt? Det dukka opp arbeid eg hadde gløymd eg hadde laga, og arbeid som eg rett og slett var drittlei. 

Biletet under er ein liten presentasjon av diverse brev, tankar, funne bilete og gåver som eg stilte ut. Det var med andre ord ikkje berre innramma arbeid som blei presentert, men og lause tråder som du ser nedanfor. Anbefaler alle som har stilt ut litt å arrangere si eiga utstilling på eit punkt. Det er hardt arbeid, men ein lærer så utruleg mykje! 

tirsdag 11. september 2012

Ambisjonar

Eg pakkar alle framtidsplanane mine inn i ein kram snøball, som eg smeller inn i husveggen.

lørdag 8. september 2012

Plastposane


Eg bor i byen.
Der må eg gå heimover i regnet med tunge handleposar.
Kvar dag gjer eg dette, og kvar dag tenkjer eg at eg må ha misforstått kva ein skal fylle dagane med.
Det kan ikkje vere dette som er livet mitt.
Tunge posar med brød og banan, bind og zalo.
I posane har eg mat som kjem til å rotne bakerst i kjøleskapet,
medan eg et noko eg har kjøpt ferdig. Kanskje fjordland.  

Fjordland fiskebollar
Fjordland karbonader
Fjordland potetball

Kvar dag drassar eg på desse plastposane, og eg dreg pose etter pose inn i livet mitt. Eg pakkar dei ut og fyller skapene mine med tom plastikk medan eg drøymer om eit betre liv.


onsdag 5. september 2012

Platecover til Anette

Dette platecoveret har eg laga til Anette Askvik i samarbeid med venninna mi Stine, som er fotograf. Anette er utruleg dyktig og inspirerande, og det er alltid fantastisk å sjå ho live. Under lanseringskonserten for plata i 2011 hadde ho med eit pikekor på scena, og det var heilt nydeleg. Heia Anette! 

mandag 3. september 2012

Samlingar


Då far min var liten samla han på fugleegg. Sist eg var heime plukka eg fram samlinga og foreviga dei med kameraet.

Her om dagen var eg på Naturhistorisk museum, og deler av samlinga byrjar å bli forholdsvis gammal. No tenkjer eg ikkje på Tyranosaurus Rex, men på dei litt loslitte dyra og alle dei vakre plansjane og monterane fulle av stein. Ei samling i større omfang enn pappa sine fugleegg, men prinsippet er det samme. Skjøre deler av naturen sirlig samla i orden og rekkefølge. 

fredag 31. august 2012

Eg gøymer meg
























Eg gøymer meg.
Eg gøymer meg langt inni deg, godt inni hjarterota di.
Nei, vent litt. Eg gøymer meg i levera di, eller kanskje i nyrene.

I  blaute og mjuke innvoller ligg eg og duvar.
Eg kruller meg samans og søv i blindtarmen din, den som alle påstår at du ikkje treng.
Eg lukker augene og synk inn i nervesystemet ditt, og eg kjenner det kvar gong du
klemmer fingrane i døra, eller har ein dårleg dag.

Eg gøymer meg i deg, eg gøymer meg i det som pumpar og pulserar. 
Tunge slag som treff meg i mellomgolvet. 

Kanskje kjem eg fram ein dag, kanskje ikkje. 
Kanskje eg døyr inni deg, og lagar ein mørk flekk 
som du må gå til ein psykolog for å få bukt med.

I mellomtida ligg eg her, i det mjuke mørkeret som er deg. 


onsdag 22. august 2012

Hit, men ikkje lengre

"Hit, men ikkje lengre" er eit hefte på 16 sider, og det har eit omslag i kalkerpapir med tittelen på.  Det består i hovudsak av teikning, men og litt tekst og foto. Eg lagde det rett og slett for å samle nokre lause tråder eg hadde liggande, og vise fram arbeidet mitt til fleire. Har du ikkje ei utstilling på trappene? Lag ei fanzine eller bind arbeidet i ei bok! Det er trist når mykje godt arbeid blir liggande i mapper i påvente av ein vegg å henge på, eller du kan fylle heftet med skisser og meir uhøgtideleg arbeid. Du kan dele ut heftet til vener, men lager du eit større antal kan du selje dei og.



onsdag 15. august 2012

Japansk binding

Her er to notatbøker eg har laga med enkel japansk binding; ein teknikk som både er dekorativ og som gjev eit sterkt resultat. Den gjer også at ein kan binde enkeltark, noko som kan kome godt med hvis du skal binde teikningar du allereie har laga, inspirasjon, utklipp eller konvoluttar. Ein må berre ta med i beregninga at det forsvinn litt av venstremargen. Ein har uendelege moglegheiter når det kjem til trådfarger, bokbindartape og omslagsfarger, i tillegg til at det finst fleir mønster å binde tråden på.  

mandag 13. august 2012

Pubertet II


Her er enda eit par av teikningane i Pubertet. Alle arbeida i fanzina er enten i blyant eller i blyant med akvarell, og i tillegg til fotoet på framsida er det og eit foto inni heftet. Å lage fanziner med eigne arbeid gjer at eg kan jobbe meir heilhetleg med teikning, tekst og bilete, og det er ein fin måte å vise fram arbeidet sitt på. Hefta har eg delt ut til vener som og driv med noko kreativt, og dei fleste av dei jobbar med foto. Det er som oftast dei som kjem med gode idéar og set mest pris på teikningane mine, akkurat som om ein ser arbeid i eit nytt medium med heilt reine auge. 

fredag 10. august 2012

Pubertet

Dette er ei fanzine eg har laga med eigne teikningar. Tittelen er Pubertet, og motiva er henta frå min eigen oppvekst. På coveret er det eit polaroidbilete av den lokale kinoen der eg vaks opp; ein kino som blei brukt meir som oppholdsstad enn ein arena for kulturopplevingar. No har kinoen flytta inn i nytt kulturhus, og eg vonar filmutvalget har fått ei oppgradering óg. Størrelsen på heftet er A5, og den kjem i ei lomme av grå kartong. Opplaget er på fem stykker som eg har delt ut til vener. 

mandag 6. august 2012

Ny skissebok for salg

Dette er ei skissebok eg har laga for salg. Den er i A5-størrelse og har 40 sider i både teiknepapir, farga papir og ruteark. Den har hardt omslag med japansk papir i svart/kvitt, og endepapir i brun, tynn kartong. Ei robust skissebok som passar perfekt i veska, og som egner seg både til tekst og teikning. 

søndag 5. august 2012

Ny, håndsydd teiknebok

Dette er den teikneboka eg jobbar i no; ei robust bok med hardt omslag og seks sydde signaturar. Den har eit enkelt grått pappomslag, med eit fargerikt endepapir. For litt over eit år sidan bestemte eg meg for at eg skal binde alle skissebøkene mine sjølv. Ikkje berre er det god bokbindertrening, bøkene betyr enda meir for meg, og eg byrjar ikkje å rive ut sider eller starte på ei ny bok før den eg har er full. I hovudsak består bøkene av ulikt teiknepapir, men eg har innslag av farga papir, kalkerpapir og skissepapir. Dette både utfordrar meg i forhold til kva eg kan bruke dei forskjellige arka til, og det gjev kontrastar til arbeida mine.